Aizawl, September 27, 2018 (DIPR): Nimin khan National Mental Health Programme, Mizoram buatsaihin CMO Office Kumtluang Hall leh OPD, District Hospital, Mamit-ah Mental Health chungchang inzirtirna leh Free Clinic neih a ni a. Dr. Zothankhuma, Chief Medical Officer, Mamit District chuan khuallian niin he hun hi a hmanpui.
He hunah hian khuallian, Dr. Zothankhuma chuan thu sawiin khawvel pumah kum tin mi Nuaih 8 vel mahni intihlum anga chhut a ni a, an intihhlum chhan ber chu rilru lam harsatna leh ruihhlo vang a ni, a ti.
Tun dinhmunah khawvela naupang leh tleirawl 20℅ vel hi rilru lam harsatna/natna nei anga chhut an ni a, rilru lama harsatna nei enkawlna kawngah hian khawtlang mipuite nena kan thawhho ṭhat a pawimawh hle a, hetiang lam natna neite hi mipuite’n en hrang loin mi pangngai angin en i la, hmangaih leh dawhthei taka enkawl chuan khawtlang tan pawh mi ṭangkai tak an nih theih thu sawiin, hetiang natna nei enkawl kawngah hian khawtlang mipuite kan pawimawhin mawhphurhna lian tak kan nei a ni, a ti bawk.
Awareness Campaign-ah hian Dr. Robert L. Khawlhring, SNO, NMPH, Lalhmingmawii, Clinical Psychologist, Angela Zohmingthangi, Psychiatric Social Worker, Zothansangi, Counselor te’n thupui thlan chhuah hrang hrang hmangin kalkhawmte zirtirna an pe a. Dr. Robert, State Nodal Officer, NMHP chuan Mizoram chhunga District pariatah District Mental Health Programme a awm tawh thu sawiin, rilru lam natnate hi natna dangte anga enkawl leh tihdam theih a nih thu a sawi bawk.
He hun hi Dr. Lalsiama Tualzik, Pediatrician-in kaihruaiin Mamit khawpui chhunga MHIP Branch hrang hrang hruaitute bakah khawpui chhung Branch hrang hranga YMA hruaitute an tel a, rilru lama harsatna nei te tan a thlawna inentirna buatsaih niin inentirte hnenah hian a thlawnin damdawi sem a ni bawk.